639.129.683 / 629.329.267
asociacion@gatocan.com
zooplus.es 

Quen somos
APA Gatocan creouse oficialmente en abril de 2006 e abriu as portas do seu refuxio en outubro de 2008. Orgullécenos afirmar que Gatocan é unha protectora de referencia, que naceu da ilusión por conseguir un mundo mellor para os que non poden falar e son vítimas inocentes do ser humano. Unha protectora que pode presumir de lograr con moitísimo esforzo, grandes cousas na súa curta traxectoria.

Quixemos facer as cousas ben dende o comezo e os terreos onde está asentado o refuxio foron comprados pola asociación. Cada espazo está coidadosamente pensado, dende a distribución até o tamaño dos caniles. Somos a única protectora en Galicia que conta con gateras pechadas en parcelas de campo, onde os gatos viven en semiliberdade cunha cabana onde guarecerse e alimentarse, árbores para trepar e espazo para correr. O tamaño das gateras tamén foi estudado e pensado para un número determinado de gatos. Actualmente temos sete gateras que acollen unha media de 25 gatos cada unha. En Gatocan nunca hacinamos animais. O sentido común dinos que non fariamos ningún favor aos nosos animais se os temos apiñados e sen espazo para moverse. Os nosos cans están constantemente saíndo a pasear, xa que contamos con cinco patios de recreo independentes, de aproximadamente 1000 metros cadrados cada un, onde se van rotando aos cans para que pasen o mínimo tempo dentro dos caniles.

En Gatocan fomos crecendo de forma comprometida e seria desde os nosos comezos. No ano 2010 fomos declarados Asociación de Utilidade Pública pola Xunta de Galicia. Conseguimos con moito esforzo ampliar as nosas instalacións no ano 2012, dobrando así a nosa capacidade para acoller cans. Logramos tamén que o concello de Coirós cedésenos unha parcela lindeira de 3000 metros cadrados, onde se habilitou a sétima gatera e nun futuro edificaremos máis se a nosa situación económica nolo permite.

En 2013 volvemos ser unha asociación de referencia, xa que a finais do mes de novembro, Gatocan conseguiu instalar placas fotovoltaicas, proporcionando así enerxía limpa 24h ás nosas instalacións cun importante aforro en combustible e contaminación, xa que antes a electricidade proporcionábaa un xerador de gasoil.

En 2014 conseguimos mellorar a seguridade das nosas instalacións instalando un circuíto pechado de televisión, con oito cámaras de seguridade e aviso policial.

Os socios da protectora tiveron unha contribución importantísima desde as orixes, para conseguir sacar a adiante este soño peludo, favorecendo as melloras nas instalacións, coa súa aportación mensual (o maior pilar de ingresos de Gatocan), facendo fronte a derramas e levando outros proxectos a cabo para recadar fondos.

Pero Gatocan é moito máis que o seu refuxio, é un grupo de persoas que se deixa a pel todos os días para loitar contra o abandono e os malos tratos, que dende fai uns anos conta cunha avogada dedicada a defender casos de malos tratos e de incumprimento de contrato, co 95% de sentenzas favorables desde entón.

En Gatocan tampouco nos esquecemos dos animais que sobreviven na rúa, xa que levamos a cabo constantemente campañas de esterilización, loitando así por conseguir colonias controladas nos nosos pobos e cidades, única maneira lóxica, civilizada e efectiva de terminar coa superpoboación. Poucas veces atopamos colaboración nos concellos pero, por sorte como outras cidades do ámbito nacional xa implantaron esta metodoloxía con éxito, algúns municipios da nosa provincia (A Coruña) como Betanzos e Malpica uníronse a esta iniciativa e as colonias controladas son xa unha realidade.

Os gastos de Gatocan son elevados e non poderían subsistir soamente co diñeiro e axuda que aportan os nosos socios e voluntarios, por iso ao longo do ano realizamos diversas accións para recadar fondos (rastrillo benéfico permanente todos os sábados na Rúa Barcelona, concertos, monólogos, lotaría, calendario cunha imaxe moi nosa e que cada ano chega a máis fogares).